14 augustus 2016, Dialectdag bij de Lebbenbrugge

Zondag 14 augustus 2016 organisaeren de Dialectkring Achterhook en Liemers en Vrienden van de Streektaal Lochem e.u. samen ne dialectmeddag bi’j de “Lebbenbrugge” in Borculo. Bi’j beide verenigingen wazzen streek- en streektaalbeuke te koop. Umme de anderhalfuur worden d’r veur edraegene deur veer streektaalschrievers.

De zale bi’j de “Lebbenbrugge” was iedere kere vol met andachtige streektaalleefhebbers, dee volop genoten van Dick ten Hoopen (Zuudwolde) den herkenbaore, angriepende verhalen vertellen oet zien warkzame laeven (hoesarts). Ok laezen e een paar mooie gedichten veur. As tweeden vertellen Hendrik Weenink (Barchem) ovver o.a. het “Galgenveld” en ok humoristische verhalen, spraekwoorden en  puntdichten kwammen an de orde bi’j Hendrik, den ok vri’jwilliger is bi’j de “Lebbenbrugge”.
Daornao vertellen Henk Lettink (Hoogeveen) o.a. ovver Kafka in ’n Achterhook, Lampenpoetsers en Treinreizen. As leste  vertellen Dini Hiddink (Lochem) herkenbaore verhalen ovver dansen in 1957, moderne familieperikelen en ze beslot eur optreden met een paar gedichten van Marga Kool en meister B. Stegeman.
De beukenkrööme deden goeie zaken en an ’t ende van dissen mooien dialectmeddag bedanken Dini Hiddink alle streektaalschrievers veur eure bereidwillige metwarking, alles in het belang van het behold van de streektaal.

De foto's  kö'j bekieken in 't fotoalbum