30 juli 2015, Dialectavond op Landgoed Kotmans

GESLAAGDEN DIALECTAOVEND OP KOTMANS


Donderdagaovend 30 juli was ’n tweeden en lesten dialectaovend van dit seizoen b’j ’t Schrieverspad op Landgood Kotmans in Miste onder Wenters. D’r kwammen ne goeie 50 dialectleefhebbers op af, dee meespat ne plaatse konnen kriegen in ’t veurlichtingsgebouw. Dat was maor good ok, want de boetentemperatuur was niks te hoge.
Veurzitter Diana Abbink kon as aerste Esther Kämink oet Aalten ’t woord gevven. Esther vertellen op de van eur bekende anstaekelijke manere komische gedichten en min of meer “waorgebeurde” verhalen.
Ferry Broshuis oet Grolle vertellen korte humoristische verhalen, o.a. oet zien book “De Deerntjes of kommer en kwel van ne stadsboer”.
Thea Onnink had mooie serieuze verhalen. Ze vertellen, dat Henk Krosenbrink d’r bi’j eur op an edrongene had, ok de oldere dialectwoorden te blieven gebroeken. Veural ’t leste verhaal van Thea passen bi’j dissen aovend. Het publiek was doodstille en allene de vöggelkes in de natuurlijke umgeving van ’t landgood leten zich heuren.
Het bunt altied mooie aovende, dee antrekkelijk bunt deur de afwisseling van verhalen en gedichten, veur edraegene deur de verschillende auteurs.

De foto's kö'j bekieken in 't fotoalbum